Psa 105 | YomNWM | STEP | Luvutudila Yave matondo, lutela dizina diandi ! Luzabikisa momo kavanga muidi makanda.

Psalms 105

Nzambi widi wukuikama

1 Luvutudila Yave matondo, lutela dizina diandi !
Luzabikisa momo kavanga muidi makanda.
2 Lunyimbidila ; lunyimbidila minzitusu.
Luyolukila mavanga mandi moso matsiminanga.
3 Nkembo kuidi dizina diandi dinlongo ;
Bika mintima mi bobo bantombanga Yave mimona khini.
4 Talanu kuidi Yave ayi kuidi zingolo ziandi ;
Tombanganu mu zithangu zioso zizi kiandi.
5 Lutebukilanga moyo matsiminanga momo kavanga ;
bikumu biandi ayi zinzengolo ziozi kayamikisa ;
6 beno nkuna Abalahami, kisadi kiandi,
beno bana ba Yakobi, batu bandi kasobula !
7 Yave niandi Nzambi eto ;
zinzengolo ziandi zidi va ntoto wumvimba.
8 Wuntebukilanga moyo nguizani andi mu zithangu zioso,
mambu momo katumina mu mili di zitsungi.
9 Nguizani yoyi yi kawizana ayi Abalahami ;
ndefi yoyi kadila Izaki.
10 Wukindisa yawu kuidi Yakobi banga nzengolo ;
kuidi Iseli banga nguizani mu zithangu zioso ;
11 “Kuidi ngeyo ndiela vana ntoto wu Kana
banga kuku ki kiuka kioki wela tambula.”
12 Buna bakidi thalu yi fioti kaka,
bafioti kuandi, banzenza mu tsi beni ;
13 vayi baba kuenda diengilanga mu makanda-makanda
tona mu kipfumu kimosi nate ku kipfumu kinkaka.
14 Kasia vana ko minsua kuidi kadi mutu wumosi mu kuba yamisa
mu diambu diawu wutemina mintinu.
15 “Kadi simba batu bama bobo ndivinda mafuta ;
kadi vangila mimbikuidi miama mambu mambimbi.”
16 Wutumisa kanda kingolo va ntoto
ayi wubunga bidia biawu bioso balunda.
17 Buna wufidisa mutu wumosi ku ntualꞌawu :
Zozefi wutekoso banga mvika.
18 Bakanga malu mandi mu zisieni ;
batula dinga diandi mu bisengo
19 nate mambu makatuba mavioka ;
nate mambu ma Yave mamonisa ti makiedika katuba.
20 Ntinu wufidisa ayi bannianguna ;
nyadi wu batu wunyekula mu kiphuanza.
21 Wumbieka pfumu mu nzo andi
nyadi wu bima bioso biobi kavua,
22 mu longa bana ba mintinu boso bu kazodidi
ayi vana nduenga kuidi bakulutu bandi.
23 Buna Iseli wukota ku Ezipite ;
Yakobi wuzingila banga nzenza mu tsi yi Hami.
24 Yave wuvanga ti batu bandi babutuka kuwombo
ayi wuba kitula batu bawombo viokila bobo baba lenda ;
25 bobo kabalula mintima mu lenda batu bandi,
mu kuendila bisadi biandi manenga.
26 Wufidisa Moyize, kisadi kiandi,
ayi Aloni mutu wowo kasobula.
27 Bavanga bidimbu biandi va khatitsikꞌawu,
matsiminanga mandi mu tsi Hami.
28 Wufidisa tombi ayi wutula tombi mu ntoto
bila basia tinguna ko mambu mandi e ?
29 Wukitula minlangu miawu menga ;
wumana sikisa vonda zimbizi ziawu.
30 Mintoto miawu miwala bisioto ;
biobi bikota nate mu bivinga bi minyadi miawu.
31 Wutuba ayi kuyiza zinzinzi ziba mitsa
ayi zingungu mu tsi awu yoso.
32 Niandi wubalula mvula mu mvula yi matadi
nzazi mu ntoto wumvimba.
33 Wumana buisa minti miawu mi vinu ayi minti miawu mi figi,
ayi kelula minti mi tsi awu.
34 Wutuba ayi makhoko mayiza ;
binzienzi bikambulu thalu.
35 Bidia kadika kunusu kinlangu mu tsi awu ;
bidia mimbutu mi ntoto awu.
36 Buna wumana vonda bana boso batheti mu tsi awu,
mimbutu mioso mitheti mi zingolo ziawu.
37 Wutotula Iseli va kimosi ayi mfuna wu palata ayi nolo ;
ayi kusia monika ko mutu wumemata mu zimvila ziawu.
38 Ezipite yimona khini bubayenda
bila tsisi yi Iseli yiba buila.
39 Wuyalumuna matuti mu diambu di kuba fuka
ayi mbazu mu kuba kienzula va builu.
40 Balomba ayi wuba fidisila zinuni
ayi wuba yukutisa mu mapha ma diyilu.
41 Wuzibula ditadi ayi nlangu wutotuka ;
banga nlangu wunneni wukumba mu dikanga.
42 Bila wutebukila moyo tsilꞌandi yinlongo
yoyi kavana kuidi Abalahami, kisadi kiandi.
43 Wutotudila batu bandi mu khini
batu bandi bobo kasobula mu biyoko bi mayangi.
44 Wuba vana mintoto mi makanda,
ayi batambula kiuka kisala batu bankaka.
45 Muingi balunda minsiku miandi
ayi bakinzika Mina miandi.
Luzitisa Yave.